雖然聖誕佳節臨近，但身為利物浦粉絲嘅求大俠，近日就冇乜心機。皆因紅軍突然爆發傷兵潮，繼之前嘅前鋒史杜列治及中場謝拉特之後，另一中場佐敦軒達臣又因為足踝受傷，可能要缺陣，令到紅軍目前只得兩名「健全」嘅中場中球員。
僅存兩名中場中
利物浦近屆沉淪咗咁耐，今屆終於有番啲勁旅本色，一直喺英超位居前列，令求大俠不知幾咁高興。點知紅軍近日傷兵一個接一個出現，令到領隊羅渣士好頭痕。繼之前史杜列治因為足踝受傷而要唞到1月底，同埋神奇隊長謝拉特亦因鼠蹊受傷，要休息到新年之後，利物浦最新嘅「十字兵」就係中場佐敦軒達臣。話說軒仔喺上周六大勝韋斯咸嘅英超中，俾韋斯咸嘅路蘭踢傷足踝。雖然佢嘅傷勢未必有謝四咁嚴重，但呢個禮拜六鬥熱刺，就基本上唔使預佢；而隨住軒仔都傷埋，紅軍就剩番兩名中場中球員係冇傷冇病啫，一個係盧卡斯，另一個就係祖阿倫。
羅渣士撐冇問題
面對呢個情況，羅渣士就死撐咁話：「謝拉特的確係己隊好重要嘅球員，但己隊係有可以代替佢嘅球員。盧卡斯今季表現出色，仲因而獲得巴西國家隊重召，我相信佢絕對可以肩負帶起球隊嘅重任。至於祖阿倫就好識得控制比賽節奏，傳波又準，呢啲都係我哋所需要嘅，因為我哋嘅打法係要喺中場不斷咁令個波流動。」
羅渣士雖然口就咁講啫，但佢哋兩個係咪真係可以代替到謝四同埋軒仔，相信大家都心中有數。唔好忘記，紅軍喺直至新年時，賽程都好頻密同好鬼難踢，要喺15日踢5場，對手係熱刺、曼城，仲要硬撼車路士㖭！只要稍有閃失，隨時由爭標一族，變番近幾屆嘅陪跑分子；所以有指羅渣士如果見勢色唔對，打算喺1月轉會巿場重開時，嗱嗱聲補入高質嘅中場。
杜琪峰＆鄭秀文齊齊《亂噏24》同3個大帝吹吹水！
周一至周五《亂噏24》約定你： http://bit.ly/appletalk24