喺《蘋果》寫欄咁耐，最開心莫過於不斷有粉絲電郵我，或者打電話去DBC財經台追股，記住到年尾，炒股一定要做不羈的風，玩一轉走咗先，但又要同佢留一手，有啲股可以番頭再買，一樣有快感，最緊要係等到佢有「N稿」，即係新嘅點子，再炒就更有意義，收到未！Prof J經常往返內地，今個月20日又去北京出席2014中國經濟形勢解釋高𥧌會，收吓料。都係嗰句，裝備自己，迎戰未來係非常緊要。
阿爺重視空氣質素
講到內地空氣質素，佢係令到阿爺最頭痛嘅問題，識我嘅都知，每逢周末假日，Prof J死都唔去旺區，原因係︰（一）唔使扮「強國人」；（二）人多空氣好鬼差，真係想死！
一見到空氣差，Prof J即刻留意下國情，發改委都話霧霾天氣係中國社會進化中不可改變嘅事實，主要原因唔使講都知，梗係用燒煤同燃油為主嘅化石能源造成啦，咁樣自然就會排放好多污染物。阿爺公佈「大氣10條」，話希望透過呢「10條」將空氣淨化，咁就梗係會執行啦！「N稿」咪就係減排和應對氣候變化嘅戰略，策略係「減、控、降」，即係減煤、控車同降塵，見到大方向，又係吹番新能源股，大佬，又要哥哥上身，唱佢嘅金曲——風繼續吹，不忍遠離。
既然不忍遠離，就要學Eason嗰句——抱擁這分鐘，Prof J今日抱擁隻中國風電（182），「N稿」係收入同盈利開始交到功課，「揸緊」成本，令到自己輕身上路，股價喺11月中破咗位加大成交爆咗上去，Prof J「追揸沽系統」指出，中國風電已經企得住0.42元，中途站睇0.64元，希望到新年嗰陣，大家有封小利是啦！繼續追蹤，出發！
徐燦傑
中國銀河國際財富管理主管
本欄逢周三刊出
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24