朋友FAQ之一：食唔食回頭草？咁睇嘅，甩拖多係因為性格唔夾，除非基本因素變，即性格有變或願意互相遷就，否則就算愛火重燃失敗機會大。炒股翻撻多因贏錢起，就算展開跌浪，多基於美好回憶而唔肯止蝕，最終連上次贏嘅都要輸凸，為了刻服呢個盲點，Samantha寧願審視基本因素，睇吓公司有冇新動作推動股價再爆升，光宇（1043）正正符合條件。
阿爺向電訊商發4G牌照，相信強國已牽起新一輪換機潮，市場研究機構IDC指，2013至2017年的中國4G手機出貨量年複合增長率高達230%，做手機鋰電池的光宇必然受惠，光宇早前擴大生產設施，已在中期業績做出成果，鋰電池營業額上升1.23倍至5.2億元人仔，而銷售量亦增1.04倍，做聯想（992）、酷派、華為和中興（763）等生意的光宇，未來不愁冇單接。
呢位「舊愛」9月推介過後曾升逾一倍，升得瘋狂相信是因為光宇遊戲代理的網遊《靈魂戰神》開始測試，今次翻撻當然係因為又有新遊戲推出喇！
光宇遊戲自家研發的《蜀山劍俠傳》開始進行測試，無論在畫質、全景3D和格鬥立體空間化等技術一點也不馬虎，加上在未來聖誕、農曆新年是網遊高𥧌期，光宇等一眾網遊股再受資金寵愛。
Samantha
本欄逢周一、三、五刊出
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24