聞西，聽來諧音，然不雅。
Simon Yam（ 此Simon不是影帝華哥任達華 ）他自己不單止未覺異樣，外號源自心儀朋友老梁所賜，簡直如珠如寶；聞就聞，西就西啦！
儀態小姐文禮賢大家閨秀不明幽默，不斷問：「點解唔係西門，係聞西箒？……」
聞西本來只是萬千路人甲，乙，丙……身處香港家陣吃喝世代，差不多係人得地盤講多兩句飲食被封食神；差不多係人煮多兩味小菜捧上枱被封廚神。命數到，細細個跟住阿嫲從街市到廚房為一家大細十幾人籌謀，張羅吃食，一切從經濟開始，不得浪費何止一粥一飯；未黃得晒嘅菜葉加氣添味轉運變碟上浪漫一抹秋色。
我們都熟悉的聞西塊肉餘生悲慘童年，幾乎可藉此一條直路打造招牌，宣傳招數。
聞西廚房出品非比尋常，我們好運，經常得惠。
咁好功夫？今時今日打得也非大用；至緊要執起鑊鏟炒得！一桌好菜放諸任何場面，幾乎必勝。
萬里出版食事書籍堪稱香港以至大中華區頂呱呱，聽說聞西能煮即時聯絡，準備2014書展前出書。
出乜書？
單單講煮，滿街都是，但名實俱備者幾稀；例如香港特許經營加盟協進會創會會長（名號水蛇春咁長！）周騫Harry Chow，煮食Blogger， Harry's Kitchen，亦友儕間傳頌。
前面說過，聞西自幼得祖母真傳；一應粵菜工藝十八般全部耍家，小菜幾碟大菜幾桌從早餐粥粉麵飯，午餐超凡牛肉麵到宴會鮑參翅肚都能，此外；銀行經理至叻將人棄我取廚餘化浪費成點點心意。不久前用三聖邨廣東名門辣汁花螺餘汁泡麵、炒飯、滾菜；一汁三味吃出耳油。
后海灣畔歡樂海鮮飯聚歸來，魚頭魚尾魚骨拆出龍躉肉碎加冷飯香菜煎出香噴噴魚飯餅……再下兩滴秘方：流浮山九記A A A 級純度極高蠔水，Heaven！美食天堂廚餘緣起；寄語出版編輯，莫小看廚餘，化腐朽為神奇，隱世單身貴族的廚藝神奇魔術肯定上位，紅出幾名星級廚餘獨男，能力樣貌出眾，宣傳事半功倍！