呢幾日個市，在着說不出的古怪，炒股唔算難賺錢，但走勢就超級兩極化，光伏產能過剩憂慮再起，龍頭保利協鑫（3800）都頂唔住插水；水泥、煤炭股走勢甚弱，有貨宜先避風頭，因個勢似乎係弱者越弱。另一方面，威足全年的科網及濠賭好似有「不死身」，炒極都有，昨文推介IGG（8002）最多飆一成，博雅（434）尾市起動，埋單漲8%，創上市新高，呢個時候只有跟紅頂白，別無他法。
另一板塊係白色家電股，海爾（1169）引入阿里巴巴搞物流，連帶海信科龍（921）齊齊破頂。大部份人天生「畏高」，唔敢高追，但股價仍屢創新高，啲貨邊個掃？最有可能就係熟知公司業務的大戶。由此角度分析，跟佢哋買貨，點都好過冒死撈跌咗九成的細價股。
年結在即，唔少基金埋單計數，廣船國際（317）自10月以來飆升逾倍，砌到上18蚊目標價，昨急瀉一成，回到15.5元，如調整黃金比率0.382倍，可見14.6元，就算要撈都等多陣。
炒股爭分奪秒，家陣可吼業績較遜的熔盛重工（1101）。公司上周發盈警，股價其後不跌反升，是典型見底訊號。阿爺出台船舶提前報廢補貼細則，勢令造船業明年定單大增，股價超落後的熔盛，短期反應將更大。該股昨突破11月以來的旗形走勢，大成交漲9%，追入短炒，目標先睇1.5元。
魏力
http://www.facebook.com/2012jason
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24