港產片《狂舞派》年中上畫時贏得口碑和票房，當中扮演柒良的蔡瀚億（BabyJohn）更人氣急升，同時迷倒不少女粉絲，大前日正是BabyJohn的27歲牛一，與此同時卻被發現了不少跟英文名為Donut的姓張女友親密合照，更有二人嘴對嘴的結婚照，原來二人已於今年5月秘婚。
記者昨日致電恭喜BabyJohn，他先避談：「我嚟緊有好多工作，想大家先focus我工作先，未想公開呢件事，我應承一講得就同大家講，計劃明年3、4月先係適當時間，呢段期間想大家畀啲空間。我呢一刻都唔想同傳媒朋友兜圈，距離我預計時間未到，真係冇必要隱瞞，我都想對記者朋友講真心話。」
「未計劃生BB」
始終有圖有真相，BabyJohn一直只肯默認秘婚，還要數月後才公佈，莫非奉子成婚，要等BB滿三個月始可把雙喜訊公開？他又說：「唔係，暫時我未有計劃生BB，我要為事業衝刺，未有咁多時間照顧小朋友。」BabyJohn經記者再三追問，他才承認婚訊：「其實係事實，不過真係想遲啲先同觀眾公佈。」
老婆演舞台劇
BabyJohn的太太Donut早於今年5月24日已把婚照跟朋友分享，相中兩人嘴對嘴sweet爆，Donut樣子甜美，BabyJohn說：「我哋拍咗7年拖，感情好穩定，唔係怕七年之癢結婚，只係覺得啱時間，好多人都話我呢個年紀算早婚，但結咗婚，我可以更專注工作。」問到Donut的職業？BabyJohn說：「佢係舞台劇演員，不過唔講咁多佢啦。」
採訪：羲和
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013