中大50晚宴 - 左丁山

中大50晚宴 - 左丁山

中文大學慶祝成立50年,早已在一年前展開一連串活動,所有投入慶祝活動嘅工作人員,忙碌一年之後,卒在十二月八日大解放,在會展中心舉行盛大晚宴之後,可以喘息一下喇啩。與十年前慶祝四十周年校慶唔同,當年適逢沙士肆虐,威爾斯醫院成重災區,中大醫學院上下忙於向沙士宣戰,籌辦校慶嘅人員面對社會氣壓低迷局面,籌款困難,士氣難振。好彩沙士在2013年上半年滅亡,中大40周年活動在下半年重回正軌,年尾之盛大晚宴先至有啲聲勢,當年左丁山為工作人員之一,開會頻頻,係幾辛苦㗎,今年左丁山只係坐在校慶籌備委員會,噴口水多過做嘢,但籌委會主席梁英偉校董(新亞工管73)就責任重大咯,所有活動都關佢事,落手落腳,忙足一年,實際執行工作由統籌及工作委員會主席許敬文教授(新亞市場80,中大副校長)指揮,孭晒飛,至於大搞校友活動,聯絡海外校友回歸、校友日等等花時間、費心思嘅工作,又係由梁英偉做校慶校友活動統籌委員會主席,有中大校友會聯會會長殷巧兒(聯合英文)、中大校友評議會主席陳志新(新亞經濟72)配合輔助校友事務處執行。至於籌款方面,今年氣氛唔錯,籌款比2003年容易得多,籌款委員會召集人彭玉榮校友(崇基經濟73,東亞銀行高級顧問),話今年中大籌款破晒紀錄,取得政府提供嘅配對基金上限(即額外多六億元),皆大歡喜。
既有充裕財政支持,今年校慶晚宴比十年前輝煌得多,雖然每張餐券收九百大元,不少校友話幾貴吓,但到了後來,一票難求,加位又加位,加到超過二百四十席,達會展Grand Hall上限,還有大量校友望門興嘆,買不到餐券。每有如此大場合少不了公關女強人葉潔馨(崇基社會學)臨場督師,十年前中大校慶晚宴如此,崇基60周年校慶如此,如果可以開單收錢,葉潔馨就發咯,不過佢係校友呢,中大梗係要綁佢上戰車做義工,全程奉獻!十二月八日之晚宴製作(production)由葉潔馨統籌,諗出Grand Hall內180度極大電視螢幕呈現類似「清明上河圖電子版」嘅效果,校友入場睇到嘩嘩聲,未坐低已經好開心。