恒基地產（012）主席李兆基（四叔）做地產做到捐地，佢三哥李兆麟（三叔）原來都係做地產，三嬸李佘少鴻更加係資深物業投資者，三叔同四叔一樣鍾意捐錢辦學，最近就捐咗300萬元畀浸會大學，浸大為表謝意將一個演講廳命名為「李兆麟伉儷演講廳」。
浸大噚日為呢個演講廳舉行命名儀式，三叔、三嬸因此罕有地公開亮相，仲有長子李應流。四叔同佢一家人可能費事一出現就搶晒三叔風頭，所以冇親身到場支持，不過一家人送咗三個花牌。
三嬸炒樓唔嘢小
相對成日笑笑口又相當健談嘅四叔，三叔就嚴肅得多，噚日只係願意企定定畀傳媒影相，傾偈就唔好喇。打扮高貴、襯晒一套名貴首飾嘅三嬸就全程笑到四萬咁口，相當高興。
三叔長子李應流話，其實三叔佢老人家都好開心，佢同四叔一樣都好鍾意做善事，將來會繼續物色合適嘅大學或者教育機構去捐錢。三叔今次捐300萬元畀浸大，就係資助全人教育教與學中心同中醫藥學院發展。
三叔幼時讀私塾，後生做過金銀業，1948年喺澳門工作，三年後來港發展，做過貿易生意，覺得地產大有作為，1965年成立兆安置業，易名兆安地產喺1973年上市，後來私有化。三嬸亦非等閒之輩，係資深物業投資者，喺銅鑼灣投資咗好多商舖，代理間經常提起「兆安李太」就係佢，聞說佢經常珠光寶氣巡舖。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange