港交所（388）行政總裁李小加與立法會金融服務界議員張華峰噚日完美示範何謂說話有骨落地！
話說李、張二人今年初因減報價機收費一事鬧翻，兩人之後時不時隔空針鋒相對，李小加噚日就借機會，喺一個研討會後拉埋張華峰一齊宣佈局部減費，每間證券行頭10部股票機，每部免收200元報價費，按全港502間券商計算，港交所一年少收1,200萬元，券商成本就可降低兩成。
搞鬼嘅係，兩人全程冇乜眼神交流，李小加講到最後，係咁話要「感謝」張華峰議員，指對方特別關心業界同港交所發展，經常畀好多建議交易所，真係好感謝對方。
張華峰似有言外之意
張華峰不甘示弱，講完歡迎港交所新舉措，希望以後有得傾再減多啲，話鋒一轉，就話「最重要係，我哋睇到交易所同李小加總裁開始對我哋業界提出嘅建議有理解，而且充份考慮……」擺明係寸李小加之前唔理佢講乜喇。
之後兩人例牌笑住握手，好似冇晒事，言歸於好咁款，差在冇來個熱情擁抱。
無計喇，港交所董事會噚日又撥出865萬元，購買港交所股份送畀李小加做獎勵，計埋過去3年，港交所累計撥出4,257萬元買港交所股份畀李小加，李小加的確要做些少戲交差嘅。
李華華
mailto:[email protected]
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24