荷蘭中場雲達華治（右）曾經係我好欣賞嘅球員，因為佢好波又靚仔，就算玻璃腳都冇所謂。不過，佢搭上隊友妻莎比娜（左）兼狠撇老婆施維雅之後，真係對佢冇晒好感。家陣突然傳出莎比娜懷胎5個月不幸流產，老土啲都要講句，唔通真係天理循環？
雖然愛情嘅嘢冇話對錯，唔係當事人更加唔會知內情，但雲達華治之前打糟糠兼撬國家隊隊友保拿奴斯嘅太太莎比娜，令人扣晒印象分。最慘嘅仲係當雲達華治同新歡莎比娜喺10月公佈有喜之後，施維雅大爆因為自己接受乳癌嘅化療冇得生，而被好想要小朋友嘅雲達華治嫌棄，令佢嘅賤男形象更加深入民心。
點知喺上個拜禮四，懷孕5個月嘅莎比娜突然唔舒服，最後要入院做人工流產手術，結果兩人一場歡喜一場空。其實，今次已經係莎比娜第二次經歷呢種「女人最痛」，佢同保拿奴斯嘅早產BB女安妮莎，就喺08年歐國盃期間過世。雖然，莎比娜或者好可憐，但可惜我細細個睇得粵語殘片太多，總覺得冥冥中自有主宰，有啲嘢你越想要，就越得唔到。文：吾中
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange