本欄一周兩件10月25號主打中國星（326），兩日最高累升80%，呢個升幅，喺濠賭股中濕濕碎。而中國星呢期股價啱啱調整咗升幅近0.236倍，手頭又揸住隻超級金蛋。再買中國星，博佢大茶飯。
中國星前排公佈，獲獨立第三方洽購澳門蘭桂坊酒店。呢壇製作，若果連埋賭業一齊出售，不得了。
條數係咁計，中國星今年上半年酒店連賭業溢利1.37億銀，濠江好景，係咁意估成瓣業務全年溢利起個孖，已經講緊2.7億銀。
賣酒店售賭業襟計
家陣場內有專業評估嘅濠賭股，今、明年度平均預測PE 35.2倍及26倍。就算以行家明年平均26倍PE作準，中國星成瓣賭業售價，去到呢個PE水位，係高達70億銀。打八折都講緊56億銀，或供股後每股0.61元，中國星現價幾多？得0.127元。保守估值係現價5倍，極之肥仔水！
又當中國星齋賣酒店，唔賣賭業。呢項資產，上年尾時，講緊約16億銀，家陣當加多30%到21億銀，唔過太。同樣以供股攤薄基準計，中國星每股套現仍然高達0.23元，貼近現價兩倍，中國星一樣肥仔。
呢期濠賭股再狂炒，半年計數，絕大部份股價起碼翻一番，創晒1年新高，而同行平均PB高達5.2倍。又當中國星最後攬實隻金蛋唔賣，以中國星今年度預測PE得4倍水位，供股後PB得0.53倍，中國星係平霸！
左計右計，中國星賣唔業務，都無得輸，而股價要升250%，先啱啱上番1年高位0.445元，到時PE都係得14.5倍。博中國星賣酒店成事，股價目標係點？都係嗰句：「The sky is the limit！」
錢雋
細價股專家
本欄逢周二、五刊出
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24