【九龍塘】現年41歲嘅杜汶澤喺電影《豪情3D》裏面會同日本AV女切磋演技，面對擁有42L嘅女優沖田杏梨，阿澤都下過一番苦功，由肥仔身形變成身材弗爆嘅型仔。雖然就冇張家輝嘅身形咁火爆，但都叫做見得吓人。套戲之前喺日本拍完之後，早排返到香港就拍埋個煞科。場煞科戲早前喺九龍塘近住肥姐生前住嘅地方開工，當日仲有打扮得好浮誇嘅超儀呢位投資者開工。
孭足一個鐘
大概晚上7點，阿澤同超儀都一身復古打扮現身，場戲就講阿澤孭住超儀行街兼講對白。比着以前仲係肥仔嘅阿澤，咁孭法相信拍唔夠半個鐘佢應該已經頂唔順，不過今時今日嘅阿澤，前後孭住超儀一個鐘，依然有心有力。當晚係最後一日戲，攝影師都不停補鏡頭同執咗唔少阿澤嘅大頭相，一直拍到成10點，搞到佢都有啲唔耐煩，仲半開玩笑咁話：「你要補到幾時呢，你知唔知訂咗位唔去都要畀錢㗎？」
原來阿澤喺微博透露，喺煞科當日訂咗四圍枱慰勞班手足，佢驚遲咗唔好意思。到佢拍完輪到超儀補戲，已經等到唔耐煩嘅阿澤就趁呢個時候上車換衫，再落嚟催個攝影師，要佢快手快腳搞掂。
採訪、攝影：潘冠恩、黃曉程
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013