騎馬人畀你嘅印象係點？係咪麻甩佬一個，操完馬整番飛煙，聲大大鹵味前鹵味後？如果你咁諗就out啦，沙田馬場有個𡃁妹騎馬人紅爆，佢響冠軍馬房蔡約翰度做嘢，叫做凱怡Yonnie，係馬圈公認嘅索女，斯斯文文但最鍾意策騎，胯下馴服唔少臭馬，亦同大部份港女一樣，得閒無事玩自拍。
Yonnie未成年已加入馬會做學員，08年去做儀仗馬策騎員，前年正式跟隨練馬師蔡約翰做騎馬人。雖然Yonnie嬌滴滴，但佢冇一般港女陋習只識Shopping同釣金龜發夢入豪門，相反好勤力，日日準時清晨4點入馬房開工，難得咁辛苦皮膚都Keep得咁好，好多日日坐喺office嘅姐仔都唔恨得咁多。
Yonnie青春無敵，班馬房麻甩佬有冇打佢主意，你同佢定，Yonnie唔止騎得，仲好砌得，原來佢入馬會之前，係香港武術隊（散打）青少年運動員，識得防狼自衛術。Yonnie仲未結婚，有冇另一半佢就懶神秘唔話你知，宅男、毒男如果欣賞吓Yonnie嘅騎功，唔係話唔得，朝早可以去沙田馬場睇佢操馬，不過天未光要到馬場，起到身先算啦！
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24