再update一吓「投資王擂台賽」戰況，唐牛距離主車群越嚟越遠，加上今個月交易日特別少，故不得不一注獨贏，今次目標為金手指謝清海打骰嘅惠理集團（806）。謝清海接受本報訪問，定下資產管理值達250億美元目標，即較現水平翻一番有多，惠理現時市值僅100億銀，仲有大把水位上，圖表亦出現突破走勢，博一轉一於揀惠理！
海爾電器（1169）宣佈引入阿里巴巴集團做戰略性股東，大搞物流業務，消息刺激海爾大升逾一成，搵相關概念股炒落後，不妨向國美（493）埋手。國美今年首9個月賺5.8億元人民幣，繼續扭虧為盈，單計第三季勁賺2.6億元，相當於上半年盈利八成，翻身力度之強有目共睹。現價年度化市盈率達20倍，如果單純以電器零售商來說，絕不便宜，點解依然有人肯買落去呢？好明顯就係睇中國美未來嘅增長潛力。國美正積極搞好線上線下轉型，優化物流及供應鏈效率，以其店舖數目逾千間兼遍佈全國250個城市嘅網絡規模，完成整合後將威力無比。早前管理層接受傳媒訪問時透露，明年會染指基金銷售，同今年開辦嘅小額貸款相呼應。是但一瓣進入收成期，都足以令股價爆升。股價由今年高位回落近兩成，有概念有業績支持，唞夠好快會再開車！
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange