宜家家居一隻原價$99.9嘅豺狼毛公仔LUFSIG「路姆西」，喺上星期六俾社民連金鷹曾浚瑛一擲而紅，全城狂掃路姆西，拎佢返屋企掟吓又好、吊高嚟媽叉又好、煲湯亦好，可憐天下路姆西，失驚無神成為咗全港市民聲討689嘅洩憤對象，真係令人始料不及呀。
噚日買唔到路姆西嘅朋友唔使失落，皆因宜家家居啲公仔原來好有政治寓意㗎，只要我哋重拾當年童真，發揮吓想像力，就可以喺呢堆公仔當中，重組番香港當今嘅政治動物農莊。
沃文售$79.9 尖啤最貴
喺咁多公仔當中，除咗路姆西，八方向大家極力推介另一隻譯名叫「沃文」（GOSIG VOVVEN）嘅黑白色狗狗，佢價錢平過路姆西，只售$79.9，叫得做沃文，話唔定係一隻癲狗，用嚟鎮壓路姆西，肯定一流。見到豺狼路姆西，好多人都會諗起佢隻「舊愛」尖啤，宜家都有隻熊人「瓦林比約」（VANDRING BJORN），貴嘢嚟㗎，賣成$169.9，睇佢個樣成熟穩重，唔似講大話，喺ifc天台掟佢落樓相信都唔會跌爛。
若然你嫌角色太少，不妨考慮購入一隻名叫KNORRIG（暫未有譯名）嘅粉紅色豬仔，同路姆西一樣賣$99.9，最適合拎住佢嚟講「你呃人」！好戲連場，可以諗諗買埋隻叫GOSIG GOLDEN嘅小狗，台灣譯名係小高登二世，最啱買嚟陪你食花生！
有網民建議宜家減價，將路姆西減到$68.9。高登男神范國威就即時改圖，將「路姆西」KEY入元旦大遊行海報，如果當日人人拎住一隻路姆西上街，結果只有「三個字」：何其壯觀！
mailto:[email protected]
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24