港股噚日跟唔到美股升，市況悶爆下，各大行分析員都無咩心水。本欄今日就寫以配售形式，在創業板上市的譽宴（8107）究竟買唔買得過。
今時今日，買樓難，結婚都唔易，揀間見得人嘅酒樓擺廿圍酒，都要差唔多花成20萬，仲未計其他雜項，例如化妝師、攝影、場地佈置、租衫等，搞一個簡簡單單嘅婚禮，閒閒地超過30萬。加上，𠵱家搞婚禮好似搞台慶咁，對對新人都花盡心思，用晒成副身家，為求一個「不一樣的婚禮」。有個朋友仔講過，傳統中式用來斟茶畀父母的跪墊，如果人手訂造，兩塊承惠至少六百蚊，如果想繡字，就每個字母加10蚊。值唔值？見仁見智啦。
配售上市慣性爆升
之不過，千金難買「難忘」兩個字，普遍後生仔又捨得出錢，做結婚生意的確有機會闖出一條血路。
基本上，依家越來越多酒樓都裝修得好豪華主攻婚宴，開多幾間之後，就以配售形式上市集資，例子就有2011年7月在創業板掛牌的喜尚控股（8179），之後間唔中都幾有鑊氣被炒高。
今日譽宴亦同樣以配售形式在創業板上市，下限1元定價，集資2,730萬元。該公司用咗大部分錢去開分店，喺香港知名度又唔低，加上配售上市的慣性可以爆升至少五成以上。
散戶可以等譽宴股價回落時再小注吸納，如果眼光好，話唔定可以放聖誔假前賺番轉快錢！
瑪姬兒
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24