社民連兩位百厭星向梁振英掉路姆西，旋即引爆搶購路姆西熱潮，IKEA周一已經斷市，大家勢估唔到有梁振英「加持」，一隻普通毛公仔會成為潮物。
起初以為社民連百厭仔金鷹隨便搵隻狼公仔，自己幫佢起個廣東粗口諧音名字，再加上「掉」呢個動作，便變成向特首講諧音粗口行為藝術。殊不知最頂癮係「路姆西」呢個名字，唔係金鷹自己改，而係IKEA自己繙譯而成，咁就真係夾都冇咁啱。
一隻灰狼名字叫路姆西，仲唔係擺明玩嘢，尤其不遲不早，偏偏就在美國重返亞洲，美國改派朝鮮六方會談代表夏千福出任駐港領事，高調在全港宣傳串連，再加上佔中與台獨勢力勾結（下刪200字）。在此關鍵時刻，IKEA推出路姆西，所為何事，要從亞太地區戰略高度思維先可以理解。希望港澳研究會能委任劉兆佳成立一個路姆西調查委員會，立即研究，並與最能破解政治陰謀之吳康民攜手合作，務必早日破案。
IKEA在內地有大型零售網絡，必須坦白交代推出路姆西背後所代表之政治陰謀。尤其係本地反動團體蘭花系，背後支持在旺角鬧事、攻擊青關會愛國群眾之林老師，究竟蘭花系同路姆西兩者是否有關連，若果形成一個叫路姆蘭花系聯盟，後果將不堪設想，為佔中注入一股新動力。
而掉路姆西之集體政治行動，又會否由香港向北方蔓延，因全國大城市均可買得到呢隻路姆西，相信維穩系統要出動，將全國宜家店內之路姆西落架。為咗挺梁，真係人都癲！
變身倒梁運動神獸
幾年前由內地吹來之草泥馬現象，雖則意思同路姆西一樣，食Mother Fxxker諧音，但始終以國語發音，有文化隔閡，唔啱年輕人本土主義口味。可以講，路姆西集中體現咗王光亞主任所總結之香港四大難題：首先人心未歸祖國，而祖國是香港母親，你班死仔連老母都要掉；第二係本土主義抬頭，路姆西乃廣東粗口諧音，仲唔係代表本土主義港獨意識；第三，青年反共意識抬頭；第四，少數傳媒針對特區政府，路姆西已成為青年倒梁運動神獸兼吉祥物，針對特首及背後支持梁之共產黨，用林鄭金句：「不言而喻」。
今後特首應強硬執法嚴打掉路姆西行為，控以公眾地方行為不檢、隨地亂拋垃圾，管有嚴重傷害弱小心靈武器等，以遏止掉路姆西行動蔓延。
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange