市場熱炒Bitcoin，最近仲有報道稱有大媽都加入搶購行列。盲炒的人雖多，但真正了解Bitcoin的人卻很少。這種連發明者都唔知係邊位的虛擬貨幣，本質是一堆靠算式計算出來的數位，設定上限係2,100萬個，現時已掘出來只有約1,200萬個。
有位IT界朋友就話，美國已有公司推出專門用來掘Bitcoin的產品，部機盛惠2,800蚊美金，當然仲未計長開部機的電費成本。朋友話，𠵱家掘Bitcoin其實難咗好多，據美國一些專門統計Bitcoin數據的網站估算，假設今日開始set機掘，13日後應該可breakeven，但6個月後已開始賺唔到錢，因Bitcoin將會難掘到令你cover唔到成本。除非你覺得可以等升值，又或者透過處理Bitcoin交易賺取手續費。
Bitcoin雖被形容是貨幣，但佢背後無資產support，無國家做靠山，「存款保障」、「貼現窗口」統統欠奉。價值高低，視乎流通量及認受性。儘管Bitcoin價格屢創新高，但𠵱家仍只得小量互聯網服務供應商肯收Bitcoin。Bitcoin越炒得勁，越多人囤積居奇，對增加流通亦冇乜好處。以現時趨勢來睇，Bitcoin似乎注定是bubble居多。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange