「發叔」劉皇發前排去咗灣仔區域法院，原來係為咗幫個朋友出庭做辯方證人，呢個就係屯門有勢力人士、綽號「跛榮」嘅沈建榮，因為沈生同佢冇註冊嘅老婆黎綺琴捲入咗一單洗黑錢案，兩公婆最後被裁定洗黑錢1,285萬元罪成，要還柙到今日再求情。
沈氏兩公婆請埋資深大狀黃敏杰同郭棟明做代表，又傳咗18個證人、連「發叔」劉皇發、同埋曾經同黃長興傳過緋聞嘅企業家「慈善舞后」徐美琪都出動埋，希望證明自己清白，證明啲錢真係沈由70年代到近年買賣土地、工作等等搵返嚟㗎。發叔話2008年曾經向沈建榮有一半股份嘅公司、用212萬買過一塊地，可惜法官話發叔對買賣嘅參與都係好片面，亦唔信沈建榮係間公司嘅老闆。
徐美琪就話2009年因適逢生日、沈建榮又問佢借250萬，雖然佢唔太識沈，但徐話自己嗰日開心，250萬又唔係大數目，咪借囉，但法官同樣唔信，仲話件事超乎現實。
至於成日幫沈處理買賣嘅律師陳鑑清都有手尾跟，因為法官話嗰啲交易根本係佢哋虛構出來，警方事後話會做嘢，睇嚟陳律師有排煩。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange