菲菲fb噚日被宜家毛公仔「路姆西」嚴重洗版。宜家嘅marketing一向都做得唔錯，對網民反應尤其快。所以唔排除宜家玩捉心理，明知香港人越禁就越搶，所以前晚傳出宜家會將隻公仔下架，結果成功化腐朽為神奇，將呢隻原本望落唔多吸引嘅公仔，成為網上潮物。
做生意一定要識捉路，反應快之餘，亦要睇遠啲。好似富士菲林咁，因為快一步走出菲林以外嘅世界，大搞轉型，所以不至於被市場淘汰，亦唔使好似柯達之前咁搞破產。
菲菲早幾年接觸過護膚品行業，當時有一個叫ASTALIFT嘅日本品牌打入香港，都係sell骨膠原、抗氧化之類嗰類，但細心睇吓品牌背景，原來品牌係富士出品。當時就諗，轉型係啱，但由菲林轉搞護膚品，兩個行業會唔會差太遠呢？
查實富士早就認定菲林終有日會變集體回憶，於是積極度橋轉型。又不得不佩服日本人嘅創意，又俾佢哋諗到菲林嘅「納米、膠原蛋白、抗氧化」技術，正正就係製藥、化妝品嘅寶藏，於是索性發展生命科技業務。富士今年盈利增長24%，生命科技業務已為公司貢獻四成收入，反映公司轉型方向似乎揀岩咗。事實證明，就算一個行業死亡，但只要有橋、有技術，都可以化腐朽為神奇。
Fifi
本欄逢周二、四刊出
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24