《星夢傳奇》早前大hit，發掘咗唔少唱將，或多或少令認為「樂壇已死」嘅觀眾，增添番唔少新鮮感。的確，歌喉呢樣嘢，真係冇樣睇，所以一班藝人至喺節目中成功「wow」到觀眾。而集靚仔、好聲音同球技於一身嘅，更加「wow」到人！放心，講緊嘅唔係李克勤，而係瑞典球隊辛斯華爾中場奇雲獲加！呢位愛爾蘭及瑞典混血型男，早前參加咗當地嘅唱歌真人騷《Idol》，獲加越戰越勇，最後一集喺觀眾投票下成為本屆冠軍，贏得一紙歌手合約，公信力十足！
24歲嘅獲加因為參加比賽，已經由「寂寂無聞」嘅球員，搖身一變成為瑞典「萬人迷」。天生一副明星相嘅獲加，要紅的確唔難，喺節目中自彈自唱盡顯音樂才華，迷倒唔少女士。其招牌笑容加電眼，極具潛質做球壇新寵，不過就略嫌花心咗啲，因為該球星話：「我係足球員，但我同樣鍾意唱歌。如果可以兩樣兼得，簡直係夢想成真。」
獲加之前已經因為唱歌大過天，累街坊要比賽延期。不過別怪他，因為同時擁有聯賽同《Idol》播放權嘅電視台，決定為獲加嘅歌聲，將球賽押後上演，球隊同球迷為咗獲加嘅星夢，不得不被迫讓路，獲加不幸成為箭靶。嗱，魚與熊掌，豈能兼得？
反正瑞典同愛爾蘭都無緣巴西世盃，唱得唔好嘥，一於唱歌啦！
文：呂晨
以女性角度看球星新聞，唔用眉筆用原子筆寫低球壇百態！
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24