城規會早前通過將有成97年歷史嘅山頂盧吉道27號英式大宅改建為精品酒店，惹嚟唔少鍾意喺盧吉道行山徑緩步跑嘅市民、明星反對，一直喺山頂收集市民簽名嘅美港聯盟主席梁太同八方講，噚日見到環境局局長黃錦星同佢老婆喺度行山，唔通局長要親自用行動反對改建？美港聯盟即時帶黃錦星睇吓個大宅同化糞池，當然唔放過叫佢簽個大名反對啦，但局長耍手又擰頭，死都唔肯簽，淨係話會返去叫同事關注吓。一直喺身邊嘅局長夫人就出手幫拖，話酒店改建咗起碼保留到唔使拆，遲吓仲可以入餐廳休息吓、high tea咁話。梁太俾佢激到紮紮跳即刻反駁，糾正局長夫人，其實酒店係冇餐廳，同埋改建只留番個殼咋。
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24