今日推介時代集團（1023），9月中宣佈全年業績後，股價拾級而上，近日更成功突破橫行區，升勢似係有餘未盡，值得望多兩眼。
時代集團主要業務為製造名牌手袋及皮具，旗下客戶可謂粒粒皆星，包括Coach（6388）、Fossil、Michael Kors等，另又引入意大利品牌TUSCAN'S，主力用作拓展中港零售業務。截至今年6月底止，全年盈利4億銀，按年增長5.1%，毛利率上升1.1個百分點至23.3%。如果以半年度盈利計，下半年賺2.1億銀，乃上市以來最佳半年，難怪股價可以反地心吸力。
大行唱好亦係另一個上升催化劑。美銀美林早前發表報告，指集團管理層透露，旗下客戶對零售前景十分樂觀，令未來定單更有睇頭，該行又稱，雖然預計Coach嘅銷售會持續收縮，但由於品牌議價能力強，定單減少反而令利潤率更可觀。時代集團派息政策亦惹人好感，雖然上市僅兩年，除2011年上半年度外，其餘時間全部有息派，現價計息率達4.4厘，吸引力十足，加上有8.3億cash在手，夠晒穩陣。
時代集團上周五收報4.99元，升4%，現價市盈率約12倍，短炒以一成升幅作目標，屆時息率仲有4厘。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange