為何莫耶斯戰績低迷至此？會否是太「黑仔」？就像上周中對愛華頓，曼聯明明攻勢較多，更有兩次中楣中柱，偏偏通通唔入；反而尾段被對手把握後防一次錯誤而輸波；又或是莫帥太想實現愛華頓作客擊敗紅魔的美夢，結果「一償所願」；可是，上仗對紐卡素送給對手41年來奧脫福首勝又點解釋？講到「黑仔」，我有個朋友去英國度蜜月，專程到奧脫福朝聖睇波；可是這「一生人一次」的盛會，就看着曼聯主場淨吞一蛋，我覺得佢仲黑仔過莫耶斯。
曼聯聯賽贏得6場，一直未能發展出一套進攻模式，足以支配球賽。同一班球員、同一個主場，只是換了一個領隊，為何轉變這樣大？其實去季曼聯陣容，除朗尼、尹佩斯兩味「主菜」，其餘就像一堆青椒、蘿蔔、芽菜；但費Sir就是有將配菜「炒出肉味」的本事；今季換了莫帥，配菜的「含水量」便無所遁形。結果場場都靠朗尼或尹佩斯等「主菜」自力更生。沒有了費Sir，伊雲斯、史摩寧、韋碧克的級數立即見底；里奧、維迪亦不再老而彌堅；最慘係本屬「心腹」的費蘭尼，莫耶斯竟也未能將其發揮運用。莫耶斯身處這「熱廚房」越來越熱。
費Sir上季尾退休，伴隨的竟是行政總裁基爾，以及梅倫史甸等教練班底一併換掉，如今已證明是冒險的決定。好在首循環曼聯已對過富咸，否則現在由深知紅魔底蘊的梅倫史甸帶領下，富咸隨時都可輕取曼聯。
方柏翹
now足球評述員
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange