鄭融首個個唱「Live Like 18 鄭融演唱會2013」，一連兩場前晚喺九展Star Hall順利完成，表演嘉賓除咗林一峰、薛凱琪，仲有扭傷腳都着高踭鞋到場支持嘅楊千嬅。鄭融勁歌熱舞，除咗擘腿表演老江湖，服裝上亦花盡唔少心思，不過佢件銀色泳衣裝，同國際巨星Beyonce喺今年8月演唱會中所着過嘅衫就極為相似，雖然唔可以話完全抄襲，當中略有修改，但馮仁昭認為，如果抄足Beyonce件衫反而仲好睇，𠵱家融姨件衫兩邊加咗長長嘅流蘇，棄用原裝嘅直間條紋，顯得有啲累贅，仲影得佢更加矮㖭。
被寸咬字唔正
除咗千嬅，丁子高、藍奕邦等都有捧場，鄭融喺台上大讚千嬅：「千嬅EQ高，處理能力好膠。」千嬅怕鄭融失言，即刻幫融姨兜，話融姨喺外地返嚟，咬字唔正係正常。鄭融前晚唱到《紅綠燈》嘅時候，頓然感觸，哽咽咗一段時間，唔知係唔係諗番當年同劉浩龍嘅一段情而感觸，嘉賓林一峰就攞鄭融同舊愛劉浩龍嘅情史嚟講笑，一峰話：「我識咗佢10年，我叫佢鄭龍，因為佢豪爽同麻甩，同咗一個龍一齊。」鄭融尷尬話：「你咁都tag到。」
撰文：馮仁昭
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013