中環在線：愛將蘇樹輝娶新抱賭王鬼馬祝賀　快啲生「蘇蝦」 - 李華華

中環在線：愛將蘇樹輝娶新抱
賭王鬼馬祝賀　快啲生「蘇蝦」 - 李華華

「賭王」何鴻燊愛將、澳博（880）CEO蘇樹輝（Ambrose）噚日娶新抱，一對新人下午喺中大行禮，晚上喺灣仔會展擺酒，賭王心情勁靚到場，回復鬼馬本色，係咁叫「蘇蝦」，叫一對新人快啲生蘇蝦。澳門前特首何厚鏵同現任特首崔世安都前後腳到賀，Ambrose果然人面廣。

蘇樹輝（右一）囝囝蘇文藻（右二）同新抱陳頌恩都係中大人，昨日下晝喺中大行禮。

澳門兩任特首畀面出席

Ambrose幫賭王經營澳門賭業幾十年，呢位老闆當然一早就到。噚晚7點半，賭王喺四太梁安琪同女兒何超盈陪同下到達會展，Ambrose親自走到地下停車區接老闆。
賭王睇落精神奕奕，心情勁靚，替老友喜事感到高興，仲好風趣，笑住重覆兩次「蘇蝦」。四太喺旁邊解話，指賭王平日叫蘇樹輝做「老蘇」，佢個仔蘇文藻就係蘇蝦，語帶相關，恭賀蘇蝦盡快生蘇蝦。賭王仲留到大約9點15分先至走，認真高興。
蘇樹輝仲請到何厚鏵同崔世安過大海來港飲宴，不過兩位前後腳出現，何厚鏵7點10分就到，逗留半粒鐘走人。崔世安大約8點15分到達，賭王走咗都未見佢離開。
此外，澳博母公司澳娛另外兩個主要股東霍英東家族同鄭裕彤家族都有代表出席，霍英東兒子霍震霆、霍震寰、彤叔兒子鄭家純齊到賀。霍震霆祝賀一對新人開開心心。
Ambrose伉儷榮升老爺奶奶，當然難掩興奮心情，笑住讚新抱值100分，最緊要盡快抱孫。蘇太打趣話，阿仔同新抱都係博士，唔使特登教佢哋夫妻相處之道。

賭王鬼馬精靈