泛民成日當「蛇齋餅糭」係政治毒草，其實只要有番多少商業頭腦，掌握吓市場脈搏，分分鐘可以幫你發圍，喺招收會員同維繫同志感情之間，殺出一條血路。
低至半價 兩星期先有貨
八方前晚同朋友食飯吹水，席間有位職工盟朋友拎咗張會員優惠購物表格出嚟，突然個個OL、少女都放低筷子上嘅肥牛，焦點落晒去嗰份訂購表度。究竟係乜嘢咁把炮？原來佢哋搞緊冬日護膚禮品訂購優惠，包括韓國人氣品牌雪花秀，最勁平成一半有多。
八方即時搶咗份訂購表返嚟睇，發現有啲嘢都真係幾抵喎，好似雪花秀支潔顏泡沫咁，原價400蚊，職工盟會員價186蚊；其他韓國熱賣品牌，好似Tony Moly蛇毒修復抗皺全效再生面膜，由$195減到$150。如果你係職工盟會員或者捐款者，都可以用呢個優惠價落單㗎。
不過呢，落單後最快兩星期先收到貨，仲講明因韓國出口政策關係，雪花秀系列落單後，可能要超過14個工作天先可以收到貨。有少女睇過呢張訂購表，評語係：「梗係冇親自飛去韓國買咁平啦，但喺香港買，一定唔係呢個價囉。」係囉，只要食吓腦，「蛇齋餅糭」都有前途㗎，開拓OL會員市場，點都化算過工聯會平賣白米等糧油雜貨，點睇都高檔好多啦！
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange