《掃毒》現正在港上映
電影《掃毒》上映前的宣傳焦點落在張家輝激吻泰國變性人Poyd身上，不過說句實話，片中兩大影帝張家輝與劉青雲，再加上被導演陳木勝譽為無冕影帝的古天樂鬥戲，更加引人入勝。
「一世人，做好一件事就夠。」這是張家輝於片中一句對白，亦是他演藝生涯的寫照。由亞視年代到「化骨龍」，再到近年奠定影帝地位，家輝坦言演好每一部戲的理念從沒改變。由喜劇轉型專拍嚴肅劇情片，他坦言不甘心一世做喜劇，難怪作出不少犧牲仍堅持下去：「我唔係劉德華，但我總可以為自己做少少嘢啩！」
撰文：文國駿
張家輝日前為宣傳陳木勝執導的新片《掃毒》接受本報專訪，片中家輝飾演的角色張子偉，在電影前後半段的反差甚大，若說他在《激戰》生活化的演出有懾住鏡頭的氣場，那家輝在《掃》片的演出便是將氣場再度擴張。
片中家輝、劉青雲及古天樂情如手足，為追捕戲中大反派有連場驚險動作場面，但家輝笑言動作戲難不倒他，反而要與泰國變性演員Poyd演親熱戲則有點「不習慣」，他說：「起初導演同我講要同變性演員有親熱戲，咁我始終都係普通人，好少遇見佢哋，所以有啲唔習慣。之後開工時見到Poyd，心諗『嘩！有冇靚成咁！』之後大家同Poyd喺片場相處耐咗，漸漸接納佢係真正女人，所以真正拍嗰時都冇乜問題！」
放棄喜劇有顧慮
電影中，張子偉一角雖然性格有大變化，但要捉拿大毒梟的目的從沒改變，問到這與演戲心態是否相似？家輝坦言：「都似㗎！張子偉好似變咗，但係目標從一而終都冇變過，因為佢記得佢老竇同佢講過：『一世人，做好一件事就夠』，對佢嚟講就係做好警察捉壞人；對我嚟講，入行想做好嘅一件事就係演好每一部電影，不論係低成本定大製作，笑片抑或劇情片我都會做到最好，呢樣嘢從來冇變過。」
由喜劇諧星轉型為演技派影帝，到底有何不足為外人道的難處？家輝認真地想了一會才說：「艱辛呀難處呀呢啲梗係有啦，最直接咪係收入囉！嗰陣有一段時間開始停接笑片，唔接戲自然冇咗好多收入啦。除咗呢樣之外，我怕兩頭唔到岸，到時drama又接唔到，笑片人哋有新人上時又唔使搵你，都驚過一輪，怕自己個名好快會喺呢行消失，咁最後當然係慶幸自己有堅持落去啦。」
既然曾有怕的時候，何苦要堅持轉型？家輝說：「作為一個演員，就係希望試多啲嘢，我當然唔係唔喜歡做喜劇。但你問我可唔可以做一世喜劇？可以，不過我會唔甘心！我唔係劉德華，一企出嚟就咁有光芒，但我總可以為自己生命做少少嘢啩！我當時就係抱住呢個信念堅持。」
自導自演太辛苦
家輝現在身份已不只演員，更有自導自演電影《盂蘭神功》，問到雙重身份會否相輔相成？他耍手擰頭表示：「雖然執導有趣，不過要自導自演太辛苦，下次只可以二擇其一。」有人說過去成就現在，問到若可重新選擇，會否從影開始便堅持接拍劇情片？家輝笑說：「我反而冇諗咁多喎，總之我聽過人講一句說話記到𠵱家，就係你覺得個天對你唔好咩？其實到最後你會發覺佢對你已經好好，係咪好玄呀？」
另外，家輝前晚出席國際短片展活動時表示，香港很需要有新人加入，但作為演員的他，支持方面有難度：「我唔識點捧新人，幫新導演就一定會，遲啲會同新導演合作。」酬勞方面，他笑說：「呢啲唔在講，我為咗香港可以大出血。幕前都好缺乏新血，好似女主角已經死咗（晒）！」
場地提供：The Metroplex
髮型：強仔
化妝：Puipui
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013