在南非最南端的那個好望角上，有一座燈塔，燈塔最高處有一個觀景台；在那裏，極目望向遠處都只是海洋，要加一點幻想，你才能夠想像那盡頭就是南極，有一群群企鵝在嬉水覓食。
尋找目標的燈塔
在那個觀景台上，最多人睇嘅其實唔係冷冷的海，而係從正中處拔地而起嘅幾支方向牌，佢哋分別指住東南西北，寫上美國（十萬九千公里）、中國（又十萬幾千公里）、英國、巴西等等，當中嘅距離係作嘅，你唔會期望我記得啩！
差幾遠都好，知道咗個方向之後，人就好似定咗啲，所以當日好多遊客都選擇同個方向牌影相，「甫士」一模一樣，都係手指家鄉加個燦爛笑容，到此一遊，就快返歸。不過，最流連忘返嘅係一班黑人小學生，佢哋唔係掛住睇靚景，而係圍住高Ling把玩佢嘅秀髮，天真好奇嘅眼光，拍得住行人專用區上嘅龍友。
終於先走一步嘅曼德拉先生，當年囚禁喺羅本島，望住個海差不多28年，冇方向牌冇路線圖，若果佢心裏面冇目標嘅燈塔的話，恐怕已經屈服咗好耐。28年喎，後生仔小朋友真係冇概念究竟係幾耐，簡單嚟講，就係8屆世界盃咁耐！喂，叫你等一屆都等唔切啦，何況8屆，不過去到民主自由、黑白分明嘅大道理時，所有世俗嘅嘢都係等閒事啫。
幾辛苦都捱得住
前幾日有幸到小學分享小故事，見到一張張可愛面容背後，原來低年級會笑得大聲啲；高年班都笑嘅，不過有啲似大人，呢頭笑完嗰頭又擔心緊升中學考名校嘅前途問題，真係有啲於心何忍。死鋤死跟，不如畀佢哋自己搵條生路嘅方向牌啦。
有咗自己揀嘅目標，幾辛苦都捱得住㗎，曼德拉叔叔話嘅。好希望嗰班黑人嘅笑容，可以出現喺香港小朋友嘅嘴角。
KEYMAN
now TV主持
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange