湖人周日會喺主場對速龍，陣中養傷多時嘅巨星拜恩（Kobe），上周五喺FB宣佈決定喺呢場比賽復出，球隊仲幫佢整咗條短片造勢；同日湖人作客帝王，有米爾斯同加素各得19分，以106:100贏波，為Kobe回歸壯聲威。（now635台明日10:30am直播湖人對速龍）
Kobe呢排已經全面復操，仲話過上周五對帝王會復出，不過最後喺新鞋發佈會話等多陣先。佢日前喺FB上載湖人幫佢整嘅短片，預告周日對速龍回歸；段片只有Kobe件波衫，喺飽受風雨折磨過後，最後雨過天晴，臨尾仲出咗：「神話繼續，12月8日」嘅字句，真係型爆。
先贏帝王壯聲勢
湖人主帥迪安東尼上周五喺對帝王賽前話：「好明顯拜恩真係覺得自己狀態足夠先做決定，而我哋亦可以睇清楚前路應該點行，所以呢個係好消息。」至於同日場波，湖人雖然一度喺第3節以大比數落後，但係當迪帥叫暫停，勁開「風筒」鬧醒班球員之後，成班湖人兵即時醒晒，最後反勝對手6分。
賽後貢獻7分、9個籃板嘅湖人中鋒佐敦希爾談及拜恩復出：「大家都知Kobe係咩人，但係𠵱家嘅佢唔可能完全靠自己，周日場波我哋要為佢而戰，盡力幫佢。」
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24