「風城之子」戴歷路斯因半月板受傷又提早收咧，但唔好當公牛係流，周四東岸大戰眾志成城下，主場107:87大炒兩連霸熱火，戴歷路斯仲話唔排除季後賽復出可能性㖭！
戴歷路斯受傷後，公牛一度錄得4連敗，不過周四主場對熱火就好醒神，大勝20分之餘，3分球19射10中，全隊籃板亦多熱火21個，真係瓣瓣掂；公牛最威就係前鋒保沙，貢獻27分同9籃板。比起贏波，路斯喺記者會上嘅發言，更令公牛迷開心，呢位25歲控衞就話：「我有可能喺季後賽復出，如果我能夠搵番健康同狀態，我就肯定會上陣。我深信自己嘅未來係一片光明。」路斯上季已因左膝十字韌帶受傷而全季休息，今季復出不久，對拓荒者一戰又弄傷右膝半月板，公牛會方已宣佈路斯今季缺陣。
大帝輸波嫌新鞋?
熱火就錄得兩連敗，亦係今季最大敗仗，唔知同前鋒勒邦占士嘅專用鞋，着得佢唔舒服有冇關係？「大帝」出道後就一直係「一剔牌」寵兒，今季仲幫佢嘅專用鞋出到第11代，但至今勒邦占士只係喺兩場比賽着新鞋，其餘都係着番舊款，「大帝」為免得罪米飯班主都好識做咁講：「我當然可以着新鞋比賽，我只感覺佢冇上一代咁舒服。」
杜琪峰&鄭秀文齊齊《亂噏24》同3個大帝吹吹水!
周一至周五《亂噏24》約定你： http://bit.ly/appletalk24