鄧萃雯前晚同埋黃秋生、鄭中基喺圓方現身電影《四大名捕2》首映，同無綫關係麻麻嘅雯女，喺今個月16日舉行嘅台慶頒獎禮繼續冇份玩，始終呢個係自己友嘅選舉，雯女都自爆話同無綫冇晒合約，好享受自由身：「好正常喎，我都冇約，唔會再出鏡。」真係同合約兼得罪高層有關？佢話：「唔好再問呢啲喇，件事冇話公唔公平，正常體制，係人之常情。」向來鍾意喺微博發聲嘅雯女，有人覺得佢嘅留言有弦外之音，佢話：「只可以答冇回應，我成日都講呢啲嘢喇，嗰啲應該係福音嚟㗎！」
秋生爭做演協會長
講到今次同秋生合作，雯女直認：「搵男演員對手唔容易，我嘅氣場好勁，好容易俾人覺得女勁過男，同秋生合作，有佢鎮壓住，可以做小女人。」現實中想唔想有呢類男人出現？佢話：「梗係想，邊度有女人鍾意咁強㗎？乜都孭上身咁辛苦。」
秋生大讚雯女係好女人，講到會唔會戥佢單身可惜？秋生話：「佢話畀你聽冇咩？」此外，黃秋生、陳觀泰同周強等，噚日喺西灣河嘅香港電影資料館出席展覽。秋生話準備參選演藝人協會會長，日前仲約見前會長曾志偉了解詳情：「約佢夜晚11點，佢凌晨兩點先嚟，傾到3、4點，我傾完就病咗。」
撰文：馮仁昭
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013