【銅鑼灣時代廣場】陳浩民同老婆蔣麗莎（Lisa）先後生咗一女一子，成功湊成「好」字，陳浩民當然更加痛錫老婆，前日下晝3點幾，兩公婆帶咗啱啱兩歲嘅長女雅薷去銅鑼灣時代廣場消遣，同行仲有Lisa媽咪同外婆，四代同堂出巡，浩浩蕩蕩又溫馨。
粉絲𢱑合照
Lisa一對子女精靈活潑，似足縮水浩民，Lisa唔介意成日將佢哋得意相貼上網，同大家分享子女成長點滴。浩民呢排唔使喺內地開工，前日就做柴可夫，帶妻女同家人去時代廣場玩，雅薷睇見現場好多卡通公仔佈置，興奮周圍走，拎住手機嘅Lisa又彎腰又踎低為囡囡影相留念，浩民都好緊張囡囡，有時仲抱住囡囡狂啜佢臉珠，鬼咁肉緊。佢哋影相期間，有幾名女粉絲認出浩民，輪流上前力邀合照，浩民都有求必應，Lisa掛住湊女懶理老公俾女圍。
浩民一家其後再上一樓影相，樂於享受免費娛樂，冇耐就見到蕭定一太太Michelle帶住歲幾嘅囡囡Souleah出現，Michelle同囡囡着住母女波鞋，包保走唔甩。佢哋大班人就係咁喺度hea咗半個鐘左右，浩民就負責做司機載屋企人離開。
採訪、攝影：徐錦池
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013