上季玩完馬後炮，今季就做預言家，同大家一齊睇吓呢周有咩好睇。今周傾咩：南美歐洲邊個勁？
恕小弟同牽牛當亞洲同非洲透明，因為計實力，呢兩個洲嘅球隊入到4強都已經還得神落，相信冠軍都不出歐洲同美洲。今屆係歐洲定美洲大機會攞冠軍？小弟就覺得美洲。
世盃有個魔咒，只要喺美洲舉行，攞冠軍嘅一定係美洲國家！由1930年起，美洲舉辦過7次決賽周，7次都係美洲球隊拎番，巴西3次，阿根廷同烏拉圭各兩次。用常識諗吓，唔算係魔咒，兵法都有講打勝仗要靠天時、地利同人和，美洲同歐洲有時差，氣候又唔同，所有歐洲球員都要適應，未必發揮出最佳水準。
唔計呢啲場外因素，美洲隊今屆實力平均咗，唔止得巴西同阿根廷，哥倫比亞同烏拉圭都好揪得！先講巴西，今年洲際盃都見到主場威力，喺決賽大炒西班牙3:0，加埋有新球王尼馬越踢越好，森巴軍團奪冠機會唔細。最重要嘅係，呢代巴西唔止進攻球員多，防線亦人才濟濟，好似後防有大衛雷斯、丹迪同馬些路，防中就仲多人，拉美利斯、路爾斯古斯達禾、荷西保連奴個個都可以獨當一面。
阿根廷雖然防線麻麻地，但勝在前鋒星光熠熠，一個美斯都已經屈晒機。哥倫比亞同烏拉圭都有超級射手壓陣，哥軍有法卡奧，烏拉圭仲要有一對，卡雲尼加蘇亞雷斯，絕對係今屆世盃最強的雙箭頭。文：咖喱
杜琪峰＆鄭秀文齊齊《亂噏24》同3個大帝吹吹水！
周一至周五《亂噏24》約定你： http://bit.ly/appletalk24