【上環】吳彥祖同老婆Lisa S.今年6月生咗囡囡Raven之後，就一副有女萬事足等做外父嘅心態。幫杜琪峯客串完《單身男女2》之後，仲宣佈明年6月前即係囡囡滿1歲之前，都唔會開工拍戲。當然佢有份客串同做老闆嘅電影《控制》做宣傳又當別論啦。
樣貌似媽咪
近排除咗去上環練拳就好少出街嘅吳彥祖，前日一家三口去咗上環歌賦街，同行嘅有一家四口嘅外籍朋友。前日下晝大概5點鐘，戴住墨鏡嘅Lisa抱住Raven現身，半歲大嘅囡囡含住奶嘴眼仔睩睩顯得好精靈，望落好似媽咪好有混血兒嘅feel，非常可愛。
消磨一個鐘
原本吳彥祖帶住老婆同外籍友人，準備行入Homeless傢俬店，不過當發現有記者影相之後，吳彥祖即刻通知身前嘅老婆，Lisa就抱囡囡上車離開，剩低老公陪一家四口朋友睇家品。個四口家庭入到去之後，位男主人對燈飾同擺設都好有興趣，不停向身旁嘅店員發問，吳彥祖就喺旁邊搭訕幾句。
至於一對外籍小朋友對店內嘅聖誕擺設好有興趣，特別係嗰位小女孩好抵死咁戴住隻鹿角裝飾，同現場環境非常配合。佢哋大概睇咗一個鐘，一行人上番吳彥祖嘅車離開。
採訪、攝影：楊浩賢、徐錦池
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013