上季玩完馬後炮，今季就做預言家，同大家一齊睇吓呢周有咩好睇。今周傾咩：南美歐洲邊個勁？
世界盃商機無限，「一剔」已經幫明年東道主巴西整咗廣告片，由真人配合卡通，但「孭飛」嘅森巴戰將已經係尼馬、大衛雷斯、堤亞高達施華等，講威勢，真係及唔上前輩，有大細哨、卡路士個期。
今屆世界盃喺南半球舉行，巴西、阿根廷、烏拉圭都曾經喺呢個地利下奪標。不過上屆南非世界盃，歐洲球隊已打破南半球僵局，由西班牙奪標，今次歐洲兵團再攻破埋南美洲呢個堡壘，絕對唔奇。
小弟覺得南北半球最大分野係天氣，世界盃期間巴西正值冬天，與歐洲相反。不過對歐洲人嚟講，要佢哋適應又熱又濕嘅亞熱帶天氣就話辛苦啫，適應寒冬天氣反而唔難，反正歐洲一年都有幾個月夠晒凍。
天時、地利都算係協助因素，球隊實力先至最緊要，不過明年我就反而睇好德國有機。德國大賽穩陣到不得了，連續3屆世界盃至少入三甲，係就係有一段青黃不接期，但係破釜沉舟幾年，𠵱家青訓水準絕不差過西班牙、巴西、阿根廷，現役常規主力個批，好似湯馬士梅拿、奧斯爾等，都係20零歲，更年輕個批，好似馬里奧葛斯、馬高列奧斯等仲湧緊上嚟，教練路維唔係怕唔夠人，係怕勁人太多唔知點揀。
講番南半球一定都係巴西同阿根廷係熱門，巴西？個人始終覺得尼馬未到孭重飛級數，阿根廷？美斯就算好番，都要解決攻強守弱問題，或者靠施蒙尼接手啦！文：牽牛
杜琪峰＆鄭秀文齊齊《亂噏24》同3個大帝吹吹水！
周一至周五《亂噏24》約定你： http://bit.ly/appletalk24