近日有個問題困擾我，事緣喺facebook開咗個專頁，寫吓戲劇笑吓時事，收視率……唔係，係瀏覽人數一向都唔錯，試過最多50幾萬人睇，真係點都多過亞視直播，其實我只不過寫嘢笑阿CY，咁都引到幾廿萬人？心諗：「有冇搞錯！」於是以後睇時間睇心情，睇吓topic啱唔啱我，寫吓寫吓又一年，時日唔經唔覺就咁過。
網民肆意攻擊
之不過，近日有事發生咗，事緣我開咗個題目，就係：「究竟乜嘢叫『白色恐怖』，傳媒之間有冇共識過？」純粹只係提出疑問一個，但竟然有意想不到效果！好多人自動上綱上線，將呢個標題同無記將壹仔列為不受歡迎嘅事聯繫咗，更加得意係，好多唔知係乜嘢粉絲、五毛定乜傢伙，留言狂攻擊我！我當時不但止唔嬲，仲蓮子蓉面口笑呵呵！你話：「死咯！唔通阿棠short咗？定係玩無恥學咗囤地波？」如果你哋咁諗就大錯特錯！須知網上乜人都有，當中唔少係儍，毋須勞氣唔使發火，皆因facebook有刪除同埋封鎖功能各一個，唔啱心水㩒個掣就將佢delete咗，你鬧完我、我將你delete，咁就當打和。
你又話：「唓！咁即係假民主，有你講冇人講噃！」
嗱，又唔可以咁講喎，嗰處係我自己平台，我有權保持佢乾淨清新，facebook係「面書」，唔使搞到變「非死不可」，何況我只不過私人發表，又唔似啲公營機構，吓吓要同市民交代清楚，不過話又說回頭，機構都不外乎人情，係人咁即係會發火，你哋仲覺得我獨裁咩？咁不如你哋諗吓點解會將一個傳媒杯葛兼封鎖，咁你就知乜嘢叫蚊髀同牛髀，有如小六見大婆。
犯罪人不存在
仲未覺悟嘅舊港人，唔只似死牛條頸歪咗，難為政府日日用新聞同你哋上課！咁都仲未睇得清楚？你睇班議員決議譴責湯顯明，一樣係盲摸摸，回禮一千幾百其實濕碎兼羞家，事關嗰啲唔係LV，又唔係Jean Paul，你話，大陸官員竟然收到魚蛋牛腩呢類cheap嘢，佢哋成世人有幾可？上到去考察唔遊山玩水，唔通去井岡山學唱紅歌？所以抵佢振振有詞咁反問：「我邊度有錯！」
另外CY一嘢就反寸阿誠哥，佢話香港重視法治，又係冇講錯。法治解釋有兩個，一個係「用方法維持管治」，至於「方法」可以好多，所以都係唔提好過；另一個例子要睇吾爾開希，唔好話自首投案，直頭連境都唔畀你過！呢個就係用CY邏輯，犯罪嘅人根本唔存在，同佢屋企僭建一樣，因為佢處理咗。
所以，錯嘅係你哋，以上講嘅通通冇錯！
一言棠
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013