這一夜喺2013年11月25日晚，400多名港大龍華街宿舍B座宿生全部formal dressing，着上綠色或黑色外袍，隆而重之喺宿舍禮堂參加本學年第二次high table dinner（高桌晚宴）。枱上有齊全刀叉，酒杯盛載紅酒，前菜後大家期待呢餐價值500蚊嘅豪宴主菜Braised Ox Tail with Rice上枱。終於嚟到，竟然係碟頭牛尾飯？好多人呆咗，覺得無論賣相用料都只係茶記20蚊貨色。
山西出產紅酒勁難飲
據宿生上載至fb「龍華街宿生關注組」資料，當晚食物由翠華集團旗下「至尊到會」供應，前菜生果蝦沙律190蚊一公斤，牛尾亦係190蚊一公斤，甜品士多啤利奶凍一打160蚊，加埋山西出產紅酒、飲品、餐具同侍應招待，每人200蚊有找。有宿生話當晚食唔飽，想要多個麵包都話冇，大呻好唔抵。
查實龍華四座宿舍宿生，上、下學期各要畀1,000蚊參加高桌晚宴，B座本學年辦得嗰兩場，即平均每場一次500蚊，就算扣除件學袍，一餐都400幾蚊。同學話越食越覺得好貴，支紅酒仲難飲到極。
八方問過其他三座宿舍宿生，佢哋話高桌晚宴有扒食，有雞有魚又有牛。來自馬來西亞嘅A座何同學話：「我朋友話佢哋想轉過嚟A座食，因為B座食物好Cheap。」B座舍監係上屆政府特首辦主任、現醫學院院長梁卓偉，當晚座上嘉賓係前政務司司長林瑞麟，據知當晚有宿生向梁反映餐飯好「削」唔值。
港大發言人回應，膳食由導師負責，當晚到會公司派咗30幾名侍應服務，話全年實質有6次晚宴，所以話一餐500蚊講法唔正確。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange