拜恩未復出，新鞋先面世！湖人巨星拜恩（Kobe）日前喺洛杉磯出席佢新戰靴Kobe Elite 9嘅發佈會，新鞋一反拜恩愛着低筒嘅傳統，轉為高筒，十足十一對拳擊手嘅鞋咁。冇錯，拜恩話對鞋嘅概念嚟自菲律賓拳王帕奎奧！
轉着高筒非關腳傷
Kobe因為熱愛足球，先鍾意着低筒波鞋，但係佢之前睇帕奎奧練拳，見到後者對拳擊鞋就一見鍾情，叫「一剔牌」幫佢用呢個元素設計新鞋。拜恩早前傷過阿基里斯腱，會唔會係因為咁，而將戰靴改做保護性較強嘅高筒呢？設計呢對波鞋嘅艾華就話：「兩年半前我哋已經開始呢個計劃，所以唔關事。」不過，鞋筒後面嗰9條紅線，就係模仿拜恩手術後嗰9針。
Kobe Elite 9售價225美元（約1,745港元），下年2月8號喺美國發售。拜恩周三已經着上新鞋練習，不過就話佢唔會上陣周五對帝王場波，但會逐場決定，即係下周日對速龍依然有機會復出。
杜琪峰＆鄭秀文齊齊《亂噏24》同3個大帝吹吹水！
周一至周五《亂噏24》約定你： http://bit.ly/appletalk24