伊巴謙莫域有「球壇呂布」外號，原來佢閒時都鍾意打機，亦估唔到佢喺虛擬世界都一樣霸氣十足。伊巴做咗新機Xbox One嘅代言人，佢話打足球遊戲唔會用番自己，原因竟然係話遊戲入面嘅伊巴都係無敵，用自己係完全屈機。咁如果佢打《三國無雙》，睇怕都唔會用呂布喎。
瑞典、PSG都唔揀
Xbox One喺香港仲未有行貨，心急人要入手就要買水貨，但據講噚日喺旺角仲賣緊5千幾港紙兼唔夠貨。香港機迷等唔等就自己衡量，但作為代言人嘅伊巴謙莫域，就梗係一早就先玩為快，仲送每一位巴黎聖日耳門（PSG）隊友一人一部新機，每部機都印咗每位隊友嘅名同球衣冧巴，認真係名貴得嚟又有心思，我求大俠都想要番部呀！
伊巴喺代言廣告度，同一位小球迷對戰足球遊戲，佢話：「就算𠵱家啲遊戲做得越嚟越真實，但始終都係冇可能喺個game裏面，入到好似我喺現實世界咁精采絕倫嘅入球。」之不過伊巴又強調自己唔會揀有佢嘅PSG或者瑞典國家隊，原因係自己能力太屈機喎：「我咁勁，用自己嚟打根本冇晒難度。」打機都一樣咁囂，真係俾你吹脹。
美斯打機變鵪鶉
另一球王美斯近期養緊傷，可以有更多時間打機。呢位《FIFA》遊戲系列代言人早排話，佢不時都會上網同世界各地嘅人連線對戰。美斯唔同伊巴，佢鍾意用番自己，用巴塞或者阿根廷嚟打，仲自稱成日贏波㖭。不過據講美斯鍾意喺領先後回傳拖延時間，同佢喺球場上嘅風格唔多似。
美斯同基斯坦奴朗拿度（C朗）係球壇宿敵，後者亦係《FIFA》系列最大對手《Winning》遊戲系列嘅代言人，不過C朗似乎對打機興趣相當一般，話就算隻game將佢嘅能力數值定得好高，但都打得麻麻哋。
足本收睇《亂噏24》謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24