梁振英同馮煒光，應可結成親密戰友關係，全力對付《蘋果日報》、主場新聞及商台李慧玲，此三大敵對勢力。被梁視為眼中釘，係特區施政舉步維艱嘅幕後黑手，重金禮聘馮煒光入特首辦做近身幕僚，整治反動媒體，特區大治指日可待。
馮煒光「po」文自爆命犯天煞孤星，因此媾唔到女，又因民主黨背景，被視為同人民政府對着幹，北方佳麗亦媾唔到，至今單身，因而自怨自艾，「po」文宣洩。相信梁振英見到佢犯天煞孤星，所以力排眾議，起用此人。大家對天煞孤星認識，來自馬榮成作品中華英雄，主角華英雄被命煞批命，指佢廿歲起命犯天煞孤星，身邊人人受害，劍聖、羅漢、潔瑜冇好死。
身邊人大禍臨頭
據觀星朋友教路，近來天朗氣清，夜觀天象，見北斗七星第四顆與第七顆連心的中垂線上，有一顆忽明忽暗的星，嗰粒就係傳說中的「天煞孤星」。老友話天煞孤星最毒之處，乃大凶之相，但凶星對本人冇影響，對身邊所有人卻極惡，係將禍害帶畀身邊嘅人，而自己反而冇事，即係邊個親近佢邊個大禍臨頭，所以一生孤獨就係咁解。
照咁睇，梁馮二人可能都係命犯天煞孤星，所以先至惺惺相惜。梁從政30年，孤獨冇朋友，行走江湖多年，連幕僚班底都冇，倉促埋班，搵埋一班古靈精怪人士，如夢熊大師、張震遠，搞到香港政治烏煙瘴氣。馮投身民主黨，在黨內一樣孤獨冇朋友，華叔在黨團內表明馮此人不可信，黨內機密唔可以畀佢知。佢公關公司主要食內地企業IPO、業績報告、股東大會呢條水，係人係鬼，早就走唔出司徒華法眼。
匯點系中人早有條線在港澳辦，王卓祺、張炳良，再加多個馮煒光，終於捱出頭來。不過，林鄭亦非省油燈，你搵馮煒光抓住宣傳戰線，我就將頭馬政務司長辦公室專員聶德權「攝」入去做新聞處長。聶德權手握新聞處資源，人強馬壯，而馮煒光乃無兵之將，下邊得一個特首新聞官供其差遣，空有一身好本領，也難以使出來。上手鄧惠鈞乃廢人一個，比新聞處班官同Information officer藐爆，冇人畀面佢。馮之大名，AO亦有所聞，上次自命白宮發言人已笑爆新聞處上下。已退休之鄧婆婆一年已鬆人，可想而知日子唔易過，問題不在外邊，而係在於內部。
正所謂「阿婆走得快，一定有古怪」！幸好馮乃天煞孤星，殺氣夠大，應可壓服新聞處及AO，問題係天煞孤星，專剋身邊人，梁振英就……
添馬男
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24