隨着CEC國際（759）股價轟烈地回吐，喺魚缸上映嘅阿信屋的故事，似乎暫告一段落。CEC國際能夠由年初7毫子，炒到年尾最多4.99元，全憑阿信屋品牌越做越勁。阿信屋分店一間接一間，更由最初零食，發展到而家家品、超市，到近期化妝精品樣樣做。相信阿信屋係目前香港唯一一間，能以單一品牌去開唔同種類舖頭嘅本地零售企業。阿信屋炒完，唔代表公司發展玩完，老闆林偉駿係一個聰明嘅商人，今後業績絕對值得大家拭目以待。
阿信屋證明，香港街坊生意都可以有驚喜。同樣都係主打師奶客，日本城母企國際家居零售（1373）大家唔可以忽視。雖然公司自從9月上市後，不論公司管理層，抑或股價都保持低調。但自從11月6日後，彷彿日本城進入新的世界，股價見底大升一成；咁啱得咁橋，當日《蘋果》即時財經報道，阿信屋開設家品店。上周五，阿信屋更揚言要開「無電器版日本城」，報道於中午一早，令當時已升唔少嘅國際家居再彈高。所以你話炒CEC影子，都唔係冇道理。
日本城同阿信屋一樣，勝在網絡大，公司招股時，已計劃於2016年前全球再開200分店。師奶客係源源不絕，有品牌加上唔貴，一定有生意。再講，毛利率高達46.1%，比阿信屋仲要高。公司近期買盤不斷，似有大戶入手，呢隻街坊股，值得大家跟進。
Fifi
本欄逢周二、四刊出
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24