阿信屋自從上月初話要搞埋化妝品之後，母公司CEC國際（759）好似食咗火藥咁，爆到唔識停，一個月累升兩倍幾。以CEC去年度（年結截至4月底止）只賺2,000萬元計，歷史市盈率高達121倍。阿信屋唔係科網股，OL鍾意買乜零食之類嘅數據，唔會有乜市場推廣價值。佢確實只係一隻利潤微薄嘅零售股，如果要justify呢個估值，盈利最起碼要增長幾倍，先叫講得過去。
阿信屋過去三年增長古仔，好大部份係靠一樣嘢：不斷開舖。只要你計得掂租金同人工條數，有本事追得番相應比重生意，點開似乎都唔係問題。不過，商舖續租一般每三年一次，即阿信屋經過呢幾年狂開舖後，明年終要面臨首個加租期。阿信屋去年純利率只有1.4%，抗禦能力可以有幾高呢？這就說明點解明年要暫停開舖，嘗試新業務提升單店收入。要整固業務，面對壓力其實唔細。
阿信屋街貨唔多。睇番中央結算最近持倉變動，近一個月每次無端爆升嘅交易日，無獨有偶，增持都係集中在某一兩間證券商身上。各位想搭順風車嘅話，要識睇路閃人。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange