恒指一連兩日調整，但短線仍未確認進入轉弱階段，原因是指數仍處於日線圖保歷加通道中軸（現延伸至23427）以上，通道仍呈向上傾的走勢，反映升勢的格局未出現改變。
而恒指短線要守住23500點的機會仍大，原因是2008年5月至今形成的超大型三角形阻力線23500點，早前已成功突破，理應演變為龐大支持。
潛在消息面同樣支持港股。觀乎12月份，除了美國退市陰霾之外，港股缺乏其他利淡因素，基金經理收爐亦令其缺少拋售指數股的誘因。
再者，內地A股於IPO重啟消息後，曾經短暫下跌，但一連兩日造好並已成功突破壞消息前水平，確認A股強勢，應可扶港股一把。總括來說，投資者短線毋須對港股感太大憂慮。
A股升浪一觸即發
事實上，恒指偏軟，二、三線股走勢卻偏強，濠賭、科網股皆逆市造好，投資者於恒指下跌時要賺錢，難度不算高，這亦有助投資者建立信心，預期後市上漲的機會將大於下跌，持港股值博率偏高。
講開A股強勢，線人同俞亮講，為數不少的外資基金經理，十分看好未來祖國表現。無他，美股炒到無厘頭咁高，A股竟然原地踏步，一旦落鑊，升幅可以好可怕。
中央政治局早前召開會議，為明年經濟工作定調，帶動內地股市昨日突破下降軌，升浪一觸即發。
投資者如果想食盡中資股的升浪，但又嫌A股ETF行得慢，惠理集團（806）會係你杯茶！
惠理由有金手指之稱的星級基金經理謝清海創辦，其點石成金能力無人不知，遠的不說，就以最近惠理增持鄭煤機（564）為例，由增持日至今，股價累積升幅逾一成，威力爆燈！
手上盡是強勢股
惠理手頭上仲有唔少強勢中資股，例如四環藥業（460）、上海醫樂（2607）。最新通告顯示，截止10月底止，集團管理資產總值高達99億美元，單月升8%，持股水漲船高固然係原因，相信不停有新資金湧入，亦是不爭事實。基金表現靚仔加上新錢不絕，年尾表現肯定肥過肥仔水！
睇估值，彭博綜合券商預測，今年市盈率22.7倍，與過去三年平均數42倍比較，大幅折讓46%。
唔好忘記，這幾年中資股無甚表現，現時卻是蓄勢待發，但估值竟較以往平，值得一博。惠理的圖表走勢亦佳，突破5元橫行阻力後如入無人之境，現價5.53元入場，第一步先以6元做目標，一旦衝穿，坐七望八不成問題。
俞亮
本欄逢周四刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange