阿里巴巴創辦人馬雲今年10月中講過「現時已不是李嘉誠的年代」，言猶在耳，活生生嘅例子就出現嘞。
根據彭博億萬富豪指數，今年45歲嘅百度創辦人李彥宏，噚日最新身家數字已經去到122.31億美元（約954億港元），超過內房企業萬達嘅董事長王健林嘅121.67億美元，成為中國新首富。
收購後 股價勁升
查實李彥宏兩周前，身家先首次超過娃哈哈創辦人宗慶后，成為內地第二大富豪，身家又增加，主要受百度7月中收購網龍（777）旗下91無線之後，股價累計勁升六成帶挈。
北京大學畢業嘅李彥宏外表斯文靚仔，喺美國攻讀電腦碩士，1994年起分別係華爾街同硅谷做過科技相關工作。1995年識到𠵱家太太馬東敏，半年後閃婚，冇耐生咗一個女。
直至1999年創辦百度，一年後就成為全球最大中文搜索引擎，再用13年時間就坐上中國首富寶座，認真傳奇。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange