呢兩日好事真係多喇！繼諸葛紫岐宣佈生咗，啱啱陳茵媺都喺微博度話生咗「小Mo子」，寫道：「Our lives have found new meaning the minute this little treasure was born...」仲上載咗兩張相片，一張係BB嘅手仔，另一張就係靚媽茵媺同BB鼻貼鼻嘅半邊面相，溫馨到爆呀！
相信BB出世嗰陣，爸爸陳豪一定係陪伴在側，查實陳豪噚日（周三）原先要喺尖沙嘴出席一個宣傳活動，但就臨時甩底，相信都係趕往去醫院陪太太分娩。因為之前茵媺都話過老公一定要陪佢產房生Ｂ，一齊見證呢個甜蜜時刻。
咁啱噚日至有報道話，最近一個月陳豪瘋狂接job賺錢，原本都唔使做到咁辛苦，唔少廠商都睇中佢哋「一家三口」。不過，老婆個肚鑼咁大，開工仲見暈，有「愛妻號」之稱嘅佢，立即禁止老婆接job，寧願自己辛苦啲。現在「小Mo子」出咗世，妻兒大過天，睇嚟陳豪都有排忙，可能都要暫停接job喇。
Aimee喺微博宣佈唔夠半粒鐘，已經有過千人轉載及留言，送上祝福！恭喜恭喜！
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013