仲有一個月唔夠時間，2013年就會劃上句號，回顧今年股市表現，唔好睇近排試衝二萬四大關，好似好勁咁，但其實由年初至今，恒指只係上升咗1,073點，升幅只係得4%。
反而，濠賭股及科網股就係「長勝將軍」。今年成功染藍的銀娛（027）暫時已爆升１倍至62.35元，金沙（1928）都唔執輸，累升近八成至60.4元；「股王」騰訊（700）咁大隻，都累漲逾78%至443.6元，金山軟件（3888）簡直勁到無朋友，激升逾2.7倍！求其揀中一隻，今年都已經大豐收。
高盛調升濠賭股目標
近日，澳門公佈上月博彩收入增幅放緩，但今個月有聖誕節呢個催化劑，相信重拾強勢應該毫無難度。
噚日高盛已經發表報告，調升多隻濠賭股的目標價，維持買入美高梅（2282）、銀娛及金沙，仲大幅調升美高梅目標價逾36%至36.7元。
投資者如果覺得呢幾隻股已經上升得太多，不妨考慮金界控股（3918），該公司喺柬埔寨開賭場，越來越多中國人鍾意去當地賭番幾手。
瑞信發表報告指，今年首9個月，到柬埔寨旅遊的強國旅客急升45%，而且金界2016年又會開多間新賭場，兼且計劃進攻俄羅斯，故首予「跑贏大市」，目標9.3元，較昨收7.68元有逾兩成升幅。
睇番金界今年股價累積升幅逾六成，噚日成功破頂，股息率接近5厘，屬於明年值博之選。
瑪姬兒
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange