圈中恩愛夫婦陳豪及陳茵媺，6月時喺法國註冊結婚，7月中就喺加拿大多倫多補擺喜酒，當時陳茵媺已懷孕四個月，陳豪梗係錫住老婆啦，補擺完喜酒後幾日，陳豪就返港開工賺奶粉錢，而老婆就專心安胎，而BB腳頭好，陳豪返港後工作不斷，不過當時佢對BB性別以及老婆喺邊度生B，就唔肯多講半句，陳豪仲話等陳茵媺返港後先公佈，事事以老婆及BB行先，認真體貼。
至九月底，茵媺終於由加拿大返港，愛妻號陳豪晨早撲入機場接老婆機，返港後茵媺甚少外出，不過茵媺喺十月初出席一個活動，當時佢就宣佈懷男嬰；至十月中，陳豪同腹大便便的茵媺，「一家三口」齊齊盛裝出席中環文華東方酒店50周年慶祝活動紀念，相當sweet，酬勞更破新高收一百萬。
到上月中，茵媺帶同家中愛貓睇醫生，雖然佢個肚已經籮咁大，但行動敏捷，全程做跟得先生的陳豪，則步步緊貼，有時仲忍唔住喺老婆身旁扶住，處處顯關心。戴口罩的茵媺，就未因大肚而假手於人，親帶貓咪睇醫生。而早前茵媺再喺微博貼相，佢喺聖誕樹前留影，雖然遮住巨肚，但就遮唔住水腫嘅手。到今日凌晨茵媺喺微博宣佈喜訊，誕下「小MO子」，認真恭喜晒！
全民起義，網民話事！
立即登入萬千星虧頒獎禮投票網，投下心目中最虧之選。
http://campaign.appledaily.com/tvawards2013