跑馬散場時，在停車場遇到馬主P，大家哭幾句馬喪之後，馬主P突然問：「照你睇，劉皇發嘅動議會唔通過？」佢當然係指十二月四日劉皇發議員提出之修訂案，將大浪西灣剔除出郊野公園範圍之事。劉皇發做咗好多年立法會議員，代表鄉議局及新界原居民利益，任內從未提出過動議或修訂案，呢次點都要做番套好戲，向新界鄉親顯示佢嘅實力，但形勢比人強，劉皇發雖則有功能組別議員支持，但在直選議席方面，泛民有足夠票數反對，所以左丁山對馬主P講：「睇怕冇乜機會咯，你受到影響咩？」
馬主P話佢係新界原居民，在北區有幾幅地，「不幸」位於郊野公園範圍內，發展不得，已經勞氣咗十幾年。左丁山問：「黃錦星局長唔係話過，現有土地用途，甚至要起村屋，都有機制處理嘅咩？」馬主P哼一聲：「啲高官永遠兩個口，黃錦星不熟世事，知乜鬼吖，名義上我地可以申請發展村屋，但實際嘅情況就係，我提出過近十次建築申請，次次受拒絕，黃錦星係管環保，噏得出就噏，但發展局轄下啲部門管建設，一於堅持任何在郊野公園範圍內的土地，多一事不如少一事，不做不錯，唔批准發展永遠冇錯，我地素來暗啞底，但一旦批准咗，知名環保人士例如林超英嘈一嘈，傳媒就會大肆報導，民主派議員會提出質詢，啲官就要孭鑊嘅啦，所以佢地點肯批箒，好多村民嘅感覺係，鄉村土地納入郊野公園範圍，形同滅村！」馬主P素來斯文，佢一定唔會參加昨日鄉民包圍立法會嗰種事情，但一肚氣情況，與一般村民相同。
香港咁多土地係郊野公園及綠色用地，大過晒所有住宅工商業社區用地面積，係世界大城市罕見，有此情況，可建築土地必然珍貴，可長期保值。左丁山唔反對保留郊野公園，同時亦唔會大罵高地價政策與樓價貴，最麻煩係有啲人既要限制土地供應，又要地價樓價跌到一個令到佢地滿意嘅水平，呢種想法極不務實，直情會想壞腦㗎！