弊傢伙！唐牛喺「投資王擂台戰」敬陪末席，真係冇眼睇。不過，有幸同咁多位高手同場比試，只要輸得唔好咁肉酸，已經好心足。模擬倉300萬元本錢已用盡，短炒部份玩一注獨贏一拖（038），勝在走勢已見突破，加上城鎮化啟動在即以及一號文件快出台，夠晒催化劑。坐貨部份則揀創維（751）及佳景（703），原因詳見早前見報文章，不贅！如有任何update，會繼續喺本欄發佈。 講今日推介前，先上一堂簡單經濟學︰市場價格由供求決定，如果貨品供應遠低於需求，價格自然水漲船高，𠵱家喪炒嘅虛擬貨幣Bitcoin就係一個好例子。
同樣道理，市場殼股賣一隻少一隻，加上內地創業板嚴禁借殼上市，殼股更加渴市，未來肯定越炒越貴。米蘭站（1150）上月中宣佈獲第三方洽購，本報其後跟進，原來潛在買家多達三個，當中包括內地名牌寄賣網寺庫。消息人士透露，其餘兩名買家甚具實力，證明米蘭站呢隻殼有價有市。
咁潛在買家點樣可以增加勝算呢？最簡單嘅方法，就係喺市場掃貨，以表誠意，可以預期，單deal一日未揭盅，米蘭站都會繼續炒。噚日一跌近10日線即反彈，好可能係調整完成嘅訊號，殼股上車機會通常一閃即逝，大家要好好把握！
唐牛
足本收睇《亂噏24》x 謝安琪；肥螳螂王晶接力上場！
周一至周五約定你《亂噏24》： http://bit.ly/appletalk24